مكتب للزواج؟؟؟

مع ظروف الحياة الضاغطه بقت كل يوم تظهر ابتكارات وتقليعات جديده فى السودان وآخر هذه الابتكارات فتح مكاتب للزواج والسبب زى ما قالو محاربة آفة العنوسه وتسهيل اجراءات الزواج وتوفيق راسين فى الحلال (والله الاهداف ساميه مافيها اى كلام) يعنى كل واحد عندو النيه لدخول اقفاص ما يسمى بالذهب من الجنسين ما عليهو الا يجهز السيرة الذاتيه حقتو من يوم ما ولدوهو ولحد تاريخ تقديم الطلب يعنى ملف متكامل من طقطق للسلام عليكم وما ينقص حبايه والملف لازم تكون فيهو شهادة طبية تثبت انك خالى من الامراض العضوية المعدية والخطيرة وشهاده طبية تانيه من دكتور الامراض النفسيه والعقلية انك ما موسوس وما عندك جنيه مبارياك ليل ونهار وتكون فى كامل قواك العقلية والنفسيه لانو بعدين بعد العرس ماتجى مع اول شكله او طلب تعمل فيها الود مجنتر وما تقدر تتحمل ضغوط الحياة اليوميه والطلبات الكتيره الراجياك وتقعد تعمل حركات (زى قبل كم يوم قريت قالو واحد طلق مرتو لانها قالت دايره ليها مكيف وهو المسيكين ما كان عندو حق المكيف وقامت البومه خيرتو يا اما المكيف او يطلقا صاحبنا ما صدق وقال الحمد لله الجات منها ورضينا بالهم والهم ابى يرضى بينا وما كضب طوالى على المأذون مشى جاب ليها ورقه الطلاق وجاء هو اصلو كان متسبب عليكم الله اسى مع الحر النار دا فيها شنو لو كان جاب ليها مكيف كان حصل شنو يعنى لكن هو كان قاعد يلقط ليها فى السبب وتلقاهو اسى شال ملفو ومشى قدم) يعنى انت لو كويس وعقلك كويس ونفسياتك كويسه نوع الطلبات الزى دى وانت جاي من الشغل زهجان وقرفان ورويحتك فى نخرتك ممكن تجيب ليك الجن من محل ما فى . ونرجع للطلبات لازم مع الملف تكون مرفق ليك صورة بالالوان 6x9 واذا الصورة ما طلعت حلوه ممكن تمشى تتصور تانى وتالت ورابع انت وراك شنو يعنى لحد ما تقتنع انو الخليقه دى ممكن تقنع الطرف التانى وفى مكاتب بتطلب صورتين صوره نص وصوره كامله عشان الكرعين ما يبقو مكعوجين وملولوين ودا اختصار للوقت عشان بعدين لمن تجى للمقابله الشخصيه ما يكتشفو كعوجة الكرعين واحسن من الاول تكون واضح لكن برضو يمكن الطرف التانى يوافق رغم الكعوجه (وحب الناس مذاهب)

وطبعا مع الملف بتكون انت كاتب مواصفات الشريك وكل واحد حيقعد يتمنى عيون خضر شعر دهبى عريض المنكعين زى ما قال عادل امام طويل القامه سمينه قصيره ست بيت عندو بيت حتى لو فى جبال كررى مافى مشكله وطالما انا دافع قروش لازم انقى واعزل وكل يومين تلاته تلفونك يرن وانت تشيل وترد الو منو معاى معاك مكتب ليلتى للزواج (اسم ليلتى دا عاجبنى لانو اسم قصر افراح ضخم فى الرياض) ممكن تجينا الساعه خمسه دايرنك فى مقابله شخصيه لقينا ليك المواصفات الانت طالبها ولو كنت حايم جيهة السجانه ولا ام درمان ولا راكب ليك حافله ومغبرن ومنطلونك مكرفس وما مستعد للمقابله وانت ساكن الكلاكله عييييييييييك متين تمشى توصل البيت وتستحما وتقشر وتتريح وتجى لانو دى معاينة ويمكن تقلب لى خطوبه ما رحله للجبل لازم تكون على سنجة عشره والا من النظره الاولى حتاكل نيم وتقعد تحنس فى الزول المتصل عليكم الله اجلو لى المقابله دى انا فى اجتماع او عندنا مناسبه فى الحاج يوسف وما بقدر اجى الساعه خمسه والكضب يطق

شوفوا لحاله النحن وصلنا ليها ولو فتحنا خشمنا يقول ليك العولمه والعالم ما عارف بقى قدر شنو والقرية بقت ما عارف شنو يعنى بالعربى الشغل لازم يبقى منظم ومرتب وشغل الهردبيسه داك شفتها فى المواصلات ولا كانت زميلتى فى الجامعه ولا اتلاقينا فى كافتيريا مافى حاجه مجان تانى داير تعمل اى حاجه تدخل يدك فى جيبك حتى لو داير تحب وتخطب لازم تدفع وانت حتبدأ الدفع من ساعة تقديم الطلب ودى رسوم طبعا وفى شرط لا تعاد الرسوم فى حالة رفض الطلب لانو فى ناس متخصصين لدراسة الطلبات وديل ما شغالين مجان واعملو حسابكم الطلب لازم يكون معقول والا سيرفض من قبل المكتب وبعدين لمن تتوفق ان شاء الله فيها رسوم تانيه يعنى انت حتدفع مهر مرتين مره للمكتب ومره لابو العروسه
؟؟؟
اسئلة كتيره دايره ليها اجابات هل نحن عاداتنا وتقاليدنا بتسمح لينا نلجأ لعرس المكاتب دا وهل زواج زى دا ممكن ينجح وهل الطريقه دى ممكن تساعد فى محاربة العنوسه ومليون سؤال وسؤال (لكن كمان يا جماعه كدى خلونا نكون واقعيين وواضحين شويه الفرق شنو يعنى هى وسيلة من وسائل التعارف لا اكتر ومافى فرق بينا وبين شغل الخاطبه بس هنا الشغل منظم ومبنى على اسس علميه وطلبات ومعاينات ومكاتب وصوالين مكيفه وامشى وتعال وتوم وشمار عشان يحللو حق الرسوم وكدا يعنى) لكن بينى وبينكم اى حاجه جديده الناس بتخاف منها وبعد شوي
ةه حيبقى الموضوع عادى جدا وفى ناس كتار حيقولو نحن ما متقنعين لكن بى تحت تحت كدا تلقاهم جهزو ملفاتهم ومشو قدموا

إنت يا أشرف المكتب ده وين! عشان عمار ده يعرس و نعمل ليهو حفله في المنتدي ده (الدخول بي تزاكر) أقصد بي تسجيل دخول